Friday , December 15 2017

Home / MCHANGANYIKO / PROFESA MBARAWA: MRADI WA UJENZI UBUNGO- KIBAHA KUIPAISHA NCHI KIUCHUMI

PROFESA MBARAWA: MRADI WA UJENZI UBUNGO- KIBAHA KUIPAISHA NCHI KIUCHUMI

1

Waziri waUjenzi, Uchukuzi na Mawasiliano, Prof.Makame Mbarawa (kulia) akipata maelezo kutoka kwa Mkurugenzi Msaidizi- Idara ya Rasilimali Watu katika Wizara ya Maji na Umwagiliaji Bi. Visensia Kagombora (katikati) kuhusu utekelezaji wa agizo la Rais Dkt. John Pombe Magufuli kuhusu ubomoaji wa majengo ya Wizara hiyo yaliyopo katika eneo la Ubungo maji Jijini Dar es Salaam. Kushoto ni Mtendaji Mkuu wa Wakala wa Barabara (TANROADS), Mhandisi Patrick Mfugale. Ziara hiyo ilifanyika jana Desemba 6, 2017.

2..

Mtendaji Mkuu wa Wakala wa Barabara (TANROADS), Mhandisi Patrick Mfugale (katikati) akifafanua jambo kwa Waziri wa Ujenzi, Uchukuzi na Mawasiliano, Prof. Makame Mbarawa kuhusu utekelezaji wa zoezi la ubomoaji wa majengo ya Wizara ya Maji na Umwagiliaji na Shirika la Umeme Nchini (TANESCO) ili kupisha ujenzi wa barabara za njia sita zinazoanzia eneo hilo hadi Kibaha Mkoani Pwani. Wengine pichani ni Watendaji wa TANESCO. Ziara hiyo ilifanyika jana Desemba 6, 2017.

3.

Waziri wa Ujenzi, Uchukuzi na Mawasiliano, Profesa Makame Mbarawa akizungumza jambo na Watendaji wa Wakala wa Barabara (TANROADS) wakati wa ziara yake ya kukagua maendeleo ya zoezi la upanuzi wa barabara katika Jiji la Dar es Salaam kutoka Ubungo hadi Kibaha Mkoani Pwani. Wengine ni Watendaji Wakuu wa TANROAD Mkoa na MakaoMakuu. Ziara hiyo ilifanyika jana Desemba 6, 2017.

4.

Waziri wa Ujenzi,  Uchukuzi na Mawasiliano, Prof.Makame Mbarawa (kushoto) akiteta jambo na Mtendaji Mkuu wa Wakala wa Barabara (TANROADS), Mhandisi Patrick Mfugale wakati wa ziara ya kukagua zoezi la upanuzi wa barabara kutoka Ubungo Jijini la Dar es Salaam hadi Kibaha Mkoani Pwani. Ziara hiyo ilifanyika jana Desemba 6, 2017.

PICHA NA MAELEZO

…………….

Na Ismail Ngayonga

MAELEZO

DAR ES SALAAM

SERIKALI imesema mradi wa ujenzi wa barabara ya njia sita kutoka Ubungo hadi Kibaha Mkoani Pwani yenye urefu wa kilometa 16 unaotarajia kuanza mwishoni mwa mwezi Desemba mwaka huu utasaidia kukuza uchumi kwa kuongeza kasi ya usafirishaji wa bidhaa katika nchi jirani kupitia bandari ya Dar es Salaam.

Akizungumza katika ziara ya kukagua maendeleo ya mradi huo jana Desemba 6, 2017, Jijini Dar es Salaam, Waziri wa Ujenzi, Uchukuzi na Mawasiliano, Prof. Makame Mbarawa alisema malengo ya Serikali ni kuhakikisha inamaliza changamoto ya msongamano na kuziwezesha barabara zote za Jiji la Dar es Salaam kupitika katika majira yote yam waka.

Prof. Mbarawa alisema Serikali imejipanga kuhakikisha kuwa mradi huo utakelezwa kwa ufanisi, viwango na ubora wa hali ya juu na kuwahakikisha wananchi waliopitiwa na mradi huo kuwa barabara hizo zitamaliza kero ya muda mrefu ya msongamano wa magari na hivyo hawana budi kuunga mkono juhudi hizo.

Kwa mujibu wa Prof. Mbarawa alisema tangu mwaka 1932 wakati wa utawala wa Gavana wa Kiingereza, Serikali iliweka sheria ya upanuzi wa barabara katika Jiji la Dar es Salaam kutokana na kutambua ongezeko la idadi ya watu na msongamano wa magari ambayo ingekuwepo katika miaka ya sasa, hivyo zoezi la ubomoaji wa nyumba hizo ulikuwa haukwepeki.

“Katika kutekeleza mradi huu wa barabara za njia sita, majengo ya Serikali ikiwemo Ofisi za Shirika la Umeme Nchini (TANESCO) na Wizara ya Maji pia yameondolewa katika maeneo ya hifadhi ya barabara ambapo mradi huu utapita, hivyo nasi wananchi hatuna budi kuunga mkono juhudi hizi” alisema Prof. Mbarawa.

Waziri Mbarawa alisema wakati wa utekelezaji wa mradi wa barabara hizo unaotarajiwa kujengwa katika kiwango cha lami, na hakutokuwa na usumbufu kwa wananchi wanaotumia barabara hizo kwani Serikali imejenga njia mbadala za pembezoni mwa Jiji ili kurahisisha usafiri wa abiria na mizigo.

Kwa upande wake, Mtendaji Mkuu wa Wakala wa Barabara Nchini (TANROADS), Mhandisi Patrick Mfugale alisema Ofisi yake imejipanga kikamilifu kutekeleza mradi huo ili kuhakikisha kuwa Jiji la Dar es Salaam linaendelea kuwa kitovu cha uchumi na kiungo cha ushirikiano baina ya Tanzania na nchi jirani.

Mhandisi Mfugale alisema katika kuondoa changamoto ya usafiri katika Jiji la Dar es Salaam, Ofisi yake imeiweka barabara ya Ubungo-Kimara katika mradi wa mabasi yaendayo haraka (BRT) hatua inayolenga kuwawezesha wananchi kushiriki kikamilifu katika shughuli za kiuchumi kwa ajili ya kuwaletea maendeleo yao.

Naye Mwananchi wa Kimara Temboni Jijini Dar es Salaam, Said Kilindo alisema wananchi wa maeneo hayo wamepokea kwa moyo mkunjufu utekelezaji wa mradi huo na kuiomba Serikali kutatua baadhi ya changamoto ikiwemo ukosefu wa miundombinu ya vyoo katika maeneo mengi ya wafanyabiashara waliokuwepo katika maeneo hayo.

About Alex

Check Also

HERM2578 (1)

WATEJA WA TANESCO KANDA YA DAR ES SALAAM NA PWANI SASA WANAWEZA KULIPA BILI KUPITIA BENKI YA NMB

 NA K-VIS BLOG WATEJA wa Shirika la Umeme Tanzania TANESCO ambao hawatumii mita za LUKU, …

Leave a Reply

Your email address will not be published. Required fields are marked *

4 + 7 =