Monday , July 23 2018

Home / MICHEZO / AZAM TENA MABINGWA WA KIHISTORIA MAPINDUZI CUP 2018 ‘YAITWANGA URA KWA MATUTA’

AZAM TENA MABINGWA WA KIHISTORIA MAPINDUZI CUP 2018 ‘YAITWANGA URA KWA MATUTA’

WAKATI ikitwaa taji la Kombe la Mapinduzi kwa mara ya pili mfululizo usiku huu, Azam FC imeandika rekodi mpya kwenye michuano hiyo baada ya kuwa ndio timu iliyolitwaa mara nyingi.

Mabingwa hao wamelitwaa taji hilo mara nne sasa, mara ya kwanza ililitwaa mwaka 2012 na kulibeba tena 2013 kabla ya kulichukua tena mara mbili mfululizo mwaka jana na huu.

Azam FC imetwaa taji hilo baada ya kuichapa URA ya Uganda kwa mikwaju ya penalti 4-3 kwenye mchezo wa fainali kufuatia dakika 90 kumalizika kwa suluhu.

Shujaa wa Azam FC alikuwa ni kipa Razak Abalora, aliyeokoa kiustadi penalti mbili za wachezaji wa URA, ya kwanza iliyopigwa na Patrick Mbowa na ile ya tano waliyopiga Brian Majwega huku nahodha msaidizi wa matajiri hao, Agrey Moris akifunga ya mwisho iliyoipa ubingwa timu hiyo.

Wachezaji wengine wa Azam FC waliopata mikwaju ya penalti ni nahodha Himid Mao ‘Ninja’, Yakubu Mohammed na winga Enock Atta huku beki wa kushoto, Bruce Kangwa akikosa penalti pekee kwa upande wa mabingwa hao kutoka viunga vya Azam Complex, Chamazi, Dar es Salaam.

Ubingwa huo unaifanya Azam FC kutwaa taji la kwanza msimu huu, huku ikiwa inaongoza kwa kulitwaa ikifanya hivyo mara nne, ikifuatiwa na Simba iliyolibeba mara tatu.

Kama Azam FC ingekuwa makini basi huenda isingefika kwenye hatua ya changamoto ya mikwaju ya penalti hii ni kutokana na mshambuliaji wake, Bernard Arthur kushindwa kuzitumia vema nafasi tatu za wazi alizopata kipindi cha kwanza.

Mchezo huo uliokuwa mkali na wa aina yake uliohudhuriwa na Rais wa Serikali ya Mapinduzi ya Zanzibar, Dk. Ali Mohamed Shein, aliyekuwa mgeni rasmi, ulishuhudiwa kipa wa Azam FC, Abalora, akifanya kazi kubwa ya kuokoa michomo mikali ya URA na kupelekea kuchaguliwa kuwa Mchezaji Bora wa mechi hiyo.

Zawadi ya Sure Boy

Ubingwa huo walioutwaa Azam FC, wameutoa zawadi kwa kiungo wa timu hiyo, Salum Abubakar ‘Sure Boy’, na hii ni baada ya kufiwa na Mama yake mzazi wiki iliyopita wakati akiwa na timu hiyo kwenye harakati za kuwania taji hilo.

Hadi Azam FC inatwaa ubingwa, imeweza kucheza jumla ya mechi sita, ikishinda mara tano na kupoteza mmoja huku ikiruhusu nyavu zake kuguswa mara moja tu, na hii ni walipofungwa bao 1-0 dhidi ya URA kabla ya kulipa kisasi kwenye mchezo huo wa fainali.

Kikosi hicho kinatarajia kuondoka visiwani Zanzibar, leo Jumapili saa 3 asubuhi kurejea jijini Dar es Salaam tayari kabisa kuanza maandalizi ya kuwakabili Majimaji ya Songea na Tanzania Prisons ya Mbeya, katika mechi zijazo mbili za Ligi Kuu ya Vodacom Tanzania Bara (VPL) zitakazofanyika wiki ijayo.

Kikosi cha Azam FC kilikuwa hivi:

Razak Abalora, Himid Mao (C), Bruce Kangwa, Agrey Moris, Yakubu Mohammed, Abdallah Kheri/Joseph Mahundi dk 59, Stephan Kingue, Frank Domayo/Iddi Kipagwile dk 58, Salmin Hoza, Bernard Arthur/Shaaban Idd dk 58, Yahya Zayd/Enock Atta dk 64.

About Alex

Check Also

dju1

SIMBA YAWASILI NCHINI UTURUKI TAYARI KUJIANDAA NA MSIMU UJAO WA LIGI KUU

Wachezaji wa timu ya Simba ya jijini Dar es salaam wamewasili nchini Uturuki wakiongozwa na …

Leave a Reply

Your email address will not be published. Required fields are marked *

nine + 10 =